ആർ.എസ്.എസ്. പരിപാടിക്കെതിരെ പ്രതിഷേധം
ന്യൂയോർക്ക്: മാഡിസൺ സ്ക്വയർ ഗാർഡനിൽ ‘എഹെഡ്’ (AHEAD) സംഘടിപ്പിക്കുന്ന, ആർ.എസ്.എസ്. മേധാവി മോഹൻ ഭാഗവത് പ്രസംഗിക്കാൻ നിശ്ചയിച്ചിരിക്കുന്ന ‘യൂണിവേഴ്സൽ വൺനെസ് സെലിബ്രേഷൻസ്’ (Universal Oneness Celebrations) എന്ന പരിപാടിക്കെതിരെ പ്രതിഷേധങ്ങൾ ശക്തമാകുന്നു. ‘ഹിന്ദൂസ് ഫോർ ഹ്യൂമൻ റൈറ്റ്സ്’, ‘ഇന്ത്യൻ അമേരിക്കൻ മുസ്ലിം കൗൺസിൽ’ എന്നിവയുൾപ്പെടെ അറുപത്തി ഒന്നോളം വരുന്ന വിവിധ മതവിഭാഗങ്ങളുടെയും പൗരാവകാശ സംഘടനകളുടെയും കൂട്ടായ്മ ഈ പരിപാടി റദ്ദാക്കണമെന്ന് ആവശ്യപ്പെട്ടു. ഹിന്ദുത്വ പ്രത്യയശാസ്ത്രം തങ്ങളെ പ്രതിനിധീകരിക്കുന്നില്ലെന്ന് ഇവർ അഭിപ്രായപ്പെട്ടു. തങ്ങളുടെ എതിർപ്പ് അറിയിക്കുന്നതിനായി പ്രതിഷേധക്കാരും ആക്ടിവിസ്റ്റുകളും പരിപാടി നടക്കുന്ന സ്ഥലത്തെത്താൻ പദ്ധതിയിട്ടിട്ടുണ്ട്. മീറ്റിംഗ് റദ്ദാക്കാനും നേതാക്കളുടെ വിസ റദ്ദാക്കാനും ഉൾപ്പെടെ പ്രതിഷേധക്കാർ ശക്തമായി ആവശ്യമുയർത്തുന്നുണ്ട്.
ഇന്ത്യയെക്കുറിച്ചുള്ള സങ്കുചിതമായ കാഴ്ചപ്പാട് പ്രചരിപ്പിക്കുന്ന ഒരു പ്രസ്ഥാനം രാജ്യത്തിന്റെ ബഹുസ്വര പാരമ്പര്യത്തിന് വിരുദ്ധമാണെന്ന് ചൂണ്ടിക്കാട്ടി, പരിപാടിയുടെ അടിസ്ഥാന പ്രത്യയശാസ്ത്രത്തെ ന്യൂയോർക്ക് സിറ്റി മേയർ സോഹ്റാൻ മംദാനി ശക്തമായി വിമർശിച്ചു. എന്നിരുന്നാലും, ഒരു സ്വകാര്യ പരിപാടി റദ്ദാക്കാനുള്ള നിയമപരമായ അധികാരം നഗരഭരണകൂടത്തിന് ഉണ്ടായെന്നു വരില്ലെന്നും അദ്ദേഹം വ്യക്തമാക്കി. പരിപാടിയിൽ പങ്കെടുക്കുന്നവർ ജാഗ്രത പാലിക്കണമെന്ന് ‘ഹിന്ദു അമേരിക്കൻ ഫൗണ്ടേഷൻ’ (HAF) സുരക്ഷാ നിർദ്ദേശം നൽകി. ഒപ്പം, ഉണ്ടാകാനിടയുള്ള തടസ്സങ്ങളിൽ നിന്ന് പങ്കെടുക്കുന്നവരുടെ പൗരാവകാശങ്ങളും ശാരീരിക സുരക്ഷയും ഉറപ്പാക്കാൻ മേയർ മംദാനിയോട് സംഘടന ആവശ്യപ്പെടുകയും ചെയ്തു.
