ചരിത്രത്തിൽ ഇന്ന്

സെപ്റ്റംബർ (September) 17

I. രക്തസാക്ഷികളായ സോഫിയയും മക്കളും

എപ്പിസ്കോൽ സഭകൾ റോമിലെ വിശുദ്ധ സോഫിയയുടെയും അവരുടെ മക്കളായ പിസ്റിന് (Faith), എൽപിസ് (Hope), അഗാപെ (Love) എന്നിവരുടെയും രക്തസാക്ഷിത്വനാൾ ഈ ദിവസമാണ് ആചരിക്കുന്നത്.

ക്രിസ്തീയ ചരിത്രത്തിലെ ഏറ്റവും ഹൃദയസ്പർശിയായ ഒരു രക്തസാക്ഷിത്വ കഥയാണ് വിശുദ്ധ സോഫിയയുടെയും മൂന്ന് മക്കളുടെയും ചരിത്രം. എ.ഡി. 2-ാം നൂറ്റാണ്ടിൽ, റോമൻ ചക്രവർത്തിയായ ഹഡ്രിയന്റെ (Hadrian) ഭരണകാലത്താണ് ഈ സംഭവം നടക്കുന്നത്. ഇറ്റലിയിൽ ജീവിച്ചിരുന്ന സോഫിയ എന്ന ഭക്തയായ ക്രിസ്ത്യൻ വിധവ, തന്റെ മൂന്ന് പെൺമക്കളെയും ക്രിസ്തീയ വിശ്വാസത്തിന്റെ മൂന്ന് പ്രധാന ഗുണങ്ങളുടെ പേരുകളിട്ടാണ് വളർത്തിയത്: പിസ്റ്റിസ് (വിശ്വാസം), എൽപിസ് (പ്രത്യാശ), അഗാപെ (സ്നേഹം). സംഭവം നടക്കുമ്പോൾ കുട്ടികൾക്ക് യഥാക്രമം 12, 10, 9 എന്നിങ്ങനെയായിരുന്നു പ്രായം.

സോഫിയ തന്റെ മക്കളെ അതീവ ഭക്തിയോടും ദൈവഭയത്തോടും കൂടിയാണ് വളർത്തിയത്. അവർ തങ്ങൾ ക്രിസ്ത്യാനികളാണെന്ന കാര്യം ഒളിച്ചുവെക്കാതെ പരസ്യമായി ജീവിച്ചു. ഇതറിഞ്ഞ അന്തിയോക്കസ് എന്ന റോമൻ ഉദ്യോഗസ്ഥൻ ഇവരെക്കുറിച്ച് ഹാഡ്രിയൻ ചക്രവർത്തിക്ക് പരാതി നൽകുകയും, ചക്രവർത്തി ഇവരെ റോമിലെ കൊട്ടാരത്തിലേക്ക് വിളിച്ചുവരുത്താൻ ഉത്തരവിടുകയും ചെയ്തു.

ചക്രവർത്തിയുടെ പീഡനങ്ങളും ധീരരായ മക്കളും
കൊട്ടാരത്തിൽ എത്തിയ പെൺകുട്ടികളുടെ പ്രായത്തിന് അതീതമായ ശാന്തതയും സൗന്ദര്യവും കണ്ട് ചക്രവർത്തി അത്ഭുതപ്പെട്ടു. ക്രിസ്തുവിനെ തള്ളിപ്പറഞ്ഞ് റോമൻ ദേവതയായ ആർട്ടെമിസിന് ബലിയർപ്പിക്കാൻ ചക്രവർത്തി അവരോട് ആവശ്യപ്പെട്ടു. എന്നാൽ ആ കുട്ടികൾ അത് ധീരമായി നിരസിച്ചു. തുടർന്ന്, അമ്മയായ സോഫിയയുടെ കണ്ണുമുന്നിലിട്ട് ആ കുഞ്ഞുങ്ങളെ ക്രൂരമായി പീഡിപ്പിക്കാൻ ചക്രവർത്തി ഉത്തരവിട്ടു.

മൂത്ത മകളായ പിസ്റ്റിസിനെ ചമ്മട്ടികൊണ്ട് അടിക്കുകയും ശരീരത്തിൽ തീപ്പൊള്ളലേൽപ്പിക്കുകയും ചെയ്തു. എന്നിട്ടും അവൾ വിശ്വാസം കൈവിടാഞ്ഞതിനാൽ ഒടുവിൽ അവളുടെ തല വെട്ടിമാറ്റി.
രണ്ടാമത്തെ മകൾ എൽപിസിനെ കത്തുന്ന ചൂടുള്ള ഒരു വലിയ അടുപ്പിലേക്ക് (furnace) എറിഞ്ഞു. ദൈവാനുഗ്രഹത്താൽ അവൾക്ക് ഒന്നും സംഭവിച്ചില്ല. ഒടുവിൽ അവളേയും വാളുകൊണ്ട് തലവെട്ടിക്കൊന്നു.
ഏറ്റവും ഇളയ മകൾ അഗാപയെ ഒരു ചക്രത്തിൽ കെട്ടിയിട്ട് ക്രൂരമായി അടിക്കുകയും പീഡിപ്പിക്കുകയും ചെയ്ത ശേഷം തലവെട്ടിക്കൊന്നു.

സോഫിയയുടെ അന്ത്യം
തന്റെ മക്കൾ ക്രൂരമായി പീഡിപ്പിക്കപ്പെടുന്നത് കാണേണ്ടി വന്നത് സോഫിയയ്ക്ക് ഏറ്റവും വലിയ മാനസിക പീഡനമായിരുന്നു. എന്നാൽ അവൾ തളർന്നുപോയില്ല; പകരം, സ്വർഗ്ഗീയ മണവാളനായ ക്രിസ്തുവിനുവേണ്ടി ഈ കഷ്ടപ്പാടുകൾ സഹിക്കാൻ അവൾ തന്റെ മക്കളെ പ്രോത്സാഹിപ്പിക്കുകയും അവർക്കായി പ്രാർത്ഥിക്കുകയുമാണ് ചെയ്തത്. സോഫിയയുടെ ആത്മീയ രക്തസാക്ഷിത്വം മക്കളുടെ മരണശേഷം ചക്രവർത്തി സോഫിയയെ ശാരീരികമായി ഉപദ്രവിക്കാതെ വിട്ടയച്ചു.

മക്കളുടെ വിയോഗത്തിലുള്ള ദുഃഖം അവളെ തകർക്കുമെന്ന് ചക്രവർത്തി കരുതി. സോഫിയ തന്റെ മക്കളുടെ മൃതദേഹങ്ങൾ വാങ്ങി, നഗരത്തിന് പുറത്തുള്ള ഒരു ഉയർന്ന കുന്നിൻ മുകളിൽ ഭക്ത്യാദരവുകളോടെ അടക്കം ചെയ്തു. തുടർന്ന് ആ കല്ലറയ്ക്കരികിൽ ഇരുന്ന് അവൾ മൂന്ന് ദിവസത്തോളം കണ്ണീരോടെ പ്രാർത്ഥിച്ചു. മൂന്നാം ദിവസം അവൾ തന്റെ ആത്മാവിനെ ദൈവത്തിന് സമർപ്പിച്ചു. ശാരീരികമായി വാളാലോ തീയാലോ പീഡിപ്പിക്കപ്പെട്ടില്ലെങ്കിലും, സ്വന്തം മക്കളുടെ രക്തസാക്ഷിത്വത്തിന് സാക്ഷ്യം വഹിക്കേണ്ടി വന്നതിലൂടെ ഹൃദയത്തിലെ കഠിനമായ വേദനയാൽ മരിച്ച സോഫിയയെയും ഒരു രക്തസാക്ഷിയായി കണക്കാക്കുന്നു.

II.  ആനാസ്റ്റാസിസ് ദൈവാലയ പ്രതിഷ്ഠ (എ.ഡി. 335)
റോമാ ചക്രവർത്തിയായ കോൺസ്റ്റന്റൈന്റെ നിർദ്ദേശപ്രകാരം യേശുക്രിസ്തുവിന്റെ പുനരുത്ഥാന സ്ഥലത്ത് നിർമ്മിച്ച ‘ചർച്ച് ഓഫ് ദി അനസ്താസിസ്’ (Church of the Resurrection/ വിശുദ്ധ കല്ലറയുടെ ദേവാലയം) എ.ഡി. 335 സെപ്റ്റംബർ 17-ന് പ്രതിഷ്ഠിക്കപ്പെട്ടു. AD 614 പേർഷക്കാരാൽ ഭാഗികമായും, 1009 ൽ ഖലീഫ യാത്ര പൂർണ്ണമായും നശിപ്പിക്കപ്പെട്ടു.

III.  എം.ഇ. ചെറിയാന്റെ ജനനം (1917)
കേരളത്തിലെ വേർപെട്ട ക്രൈസ്തവ സമൂഹങ്ങളിൽ പ്രശസ്തനും “അനുഗ്രഹത്തിൻ അധിപതിയേ…” ഉൾപ്പെടെ നിരവധി അനുഗ്രഹീത ക്രൈസ്തവ ഭക്തിഗാനങ്ങളുടെ രചയിതാവുമായ എം.ഇ. ചെറിയാൻ 1917 സെപ്റ്റംബർ 17-ന് പത്തനംതിട്ടയിലെ കുറിയന്നൂരിൽ ജനിച്ചു.