തുറന്നു പറയൂ, നിറഞ്ഞു കവിയൂ

“നിന്റെ വായ് വിസ്താരത്തിൽ തുറക്ക; ഞാൻ അതിനെ നിറയ്ക്കും” (സങ്കീർത്തനം 81:10)

ദൈവം തന്റെ ജനത്തോട് അത്യന്തം വാത്സല്യത്തോടെ പറയുന്ന ഒരു വാഗ്ദാനമാണിത്. നമ്മുടെ ആവശ്യങ്ങളും ആഗ്രഹങ്ങളും ദൈവസന്നിധിയിൽ തുറന്നുപറയുമ്പോൾ, അവിടുന്ന് അത് നിറച്ചുതരുമെന്ന് ഈ വചനം നമ്മെ ഓർമ്മിപ്പിക്കുന്നു. ഈ വാഗ്ദാനം നമ്മുടെ ആത്മീയവും ഭൗതികവുമായ ജീവിതത്തിൽ നാലു പ്രധാന തലങ്ങളിലാണ് നിറവേറപ്പെടുന്നത്.

1. സ്തുതിക്കായി വായ് തുറക്കൽ
ദൈവമക്കളുടെ ഏറ്റവും പ്രധാനപ്പെട്ട ഒരു നിയോഗം അവനെ സ്തുതിക്കുക എന്നതാണ്. നമ്മുടെ അധരങ്ങൾ ദൈവമഹത്വത്താൽ നിറയുമ്പോൾ നാം ദൈവാലയത്തിൽ മാത്രമല്ല, ജീവിതത്തിന്റെ പ്രതികൂല സാഹചര്യങ്ങളിലും വിജയം കാണുന്നു.

• സ്തുതി എന്നത് വെറുമൊരു ചടങ്ങ് മാത്രമല്ല, അത് ഇരുണ്ട അന്തരീക്ഷത്തെ പ്രകാശപൂരിതമാക്കുന്ന ആയുധമാണ്. സ്‌തുതി ദൈവ സാന്നിധ്യം ഉറപ്പാക്കുന്നു.

• നമ്മുടെ അധരങ്ങളെ അവിടുത്തെ സ്തുതിയാൽ നിറയ്ക്കുവാൻ നാം വായ് തുറക്കുമ്പോൾ, ദൈവം തന്റെ നന്മകളാൽ നമ്മുടെ ഹൃദയത്തെയും ജീവിതത്തെയും സന്തോഷം കൊണ്ട് നിറയ്ക്കുന്നു.

2. പ്രാർത്ഥനയ്ക്കായി വായ് തുറക്കൽ
പ്രാർത്ഥന എന്നത് ദൈവവുമായുള്ള ആത്മാർത്ഥമായ സംഭാഷണമാണ്. ചെറിയ പ്രാർത്ഥനകൾക്ക് ചെറിയ മറുപടികളും, വലിയ വിശ്വാസത്തോടെയുള്ള പ്രാർത്ഥനകൾക്ക് വലിയ വിടുതലുകളും ദൈവം നൽകുന്നു.

• “വിസ്താരത്തിൽ തുറക്കുക” എന്നാൽ വലിയ കാര്യങ്ങൾ ചോദിക്കാൻ മടിക്കേണ്ടതില്ല എന്നർത്ഥം.

• നമ്മുടെ പരിമിതികളിൽ ഒതുങ്ങിനിൽക്കാതെ, ദൈവത്തിന്റെ അനന്തമായ കരുണയിലും ശക്തിയിലും പ്രത്യാശവെച്ച് വായ് തുറന്ന് യാചിക്കുമ്പോൾ, അവിടുന്ന് നമ്മുടെ ആവശ്യങ്ങളെ അതിശയകരമായി നിറവേറ്റിത്തരുന്നു.

3. സാക്ഷീകരണത്തിനായി വായ് തുറക്കൽ
ദൈവം നമ്മുടെ ജീവിതത്തിൽ ചെയ്ത അത്ഭുതങ്ങളും നന്മകളും ലോകത്തോട് വിളിച്ചുപറയുക എന്നത് ഓരോ വിശ്വാസിയുടെയും കടമയാണ്.

• നാം കർത്താവിനെക്കുറിച്ച് സംസാരിക്കാൻ തയ്യാറാകുമ്പോൾ, പരിശുദ്ധാത്മാവ് നമ്മെ കൃപകളാൽ നിറയ്ക്കുകയും സംസാരിക്കേണ്ട വാക്കുകളും ശുശ്രൂഷാ നിറവുകളും നമുക്ക് നൽകുകയും ചെയ്യുന്നു.

• സാക്ഷീകരണം മറ്റുള്ളവരുടെ വിശ്വാസത്തെ ബലപ്പെടുത്തുകയും ദൈവനാമത്തിന് മഹത്വം കൊണ്ടുവരികയും ചെയ്യുന്നു.

4. ശാരീരിക ആവശ്യം ആഹാരം എന്നിവക്ക്:
ഈ സങ്കീർത്തനത്തിന്റെ പശ്ചാത്തലം നോക്കിയാൽ, ഇസ്രായേൽ ജനത്തെ മിസ്രയീമിൽ നിന്ന് പുറത്തിറക്കി മരുഭൂമിയിലൂടെ നടത്തിയപ്പോൾ അവരുടെ ആഹാരത്തിന്റെയും വെള്ളത്തിന്റെയും ആവശ്യങ്ങൾ ദൈവം എങ്ങനെ അത്ഭുതകരമായി നടത്തി എന്ന് കാണാം.

• ശരീരത്തിന് ജീവനും ശക്തിയും നൽകുന്ന ആഹാരം നൽകി നമ്മെ പോഷിപ്പിക്കുന്നത് സർവ്വശക്തനായ ദൈവമാണ്.

• നാം നമ്മുടെ ഭൗതിക ആവശ്യങ്ങൾക്കായി അവിടുത്തെ മുൻപിൽ വായ് തുറക്കുമ്പോൾ, ദൈവം നമ്മുടെ അന്നം മുട്ടിക്കാതെ ആവശ്യമായതൊക്കെ നൽകി നമ്മെ സംരക്ഷിക്കുന്നു.

പ്രിയമുള്ളവരെ, നമ്മുടെ ജീവിതത്തിൽ എന്ത് ആവശ്യമാണ് ഉള്ളത്? ആത്മീയ ശക്തിയോ, പ്രാർത്ഥനയ്ക്കുള്ള ഉത്തരമോ, സ്തുതിക്കാനുള്ള മനസ്സോ, അതോ അനുദിന ആവശ്യങ്ങളോ? ഇന്ന് നാം ചെയ്യേണ്ടത് ഒന്നു മാത്രം—വിശ്വാസത്തോടെ നമ്മുടെ വായ് വിസ്താരത്തിൽ തുറക്കുക. അവിടുന്ന് വാഗ്ദത്തം പാലിക്കുന്ന ദൈവമായതുകൊണ്ട്, നമ്മുടെ ജീവിതത്തെ തന്റെ നന്മകളാലും കൃപയാലും സമൃദ്ധമായി നിറയ്ക്കും എന്നതിൽ സംശയമില്ല.

സമർപ്പണ പ്രാർത്ഥന
സ്വർഗ്ഗീയ പിതാവേ,
നിന്റെ വായ് വിസ്താരത്തിൽ തുറക്കുക, ഞാൻ അതിനെ നിറയ്ക്കും എന്ന് വാഗ്ദാനം ചെയ്ത വിശ്വസ്തനായ ദൈവമേ, ഞങ്ങൾ അവിടുത്തെ സന്നിധിയിൽ പൂർണ്ണമായി സമർപ്പിക്കുന്നു. നാഥാ, എന്റെ അധരങ്ങളെ അവിടുത്തെ അപദാനങ്ങളും സ്തുതികളും പാടുവാൻ ഞാൻ തുറന്നുതരുന്നു; എന്റെ ഹൃദയത്തെ ദൈവീക സന്തോഷത്താൽ അവിടുന്ന് നിറയ്ക്കണമേ.
എന്റെ യാചനകളും ഭാരങ്ങളും അവിടുത്തെ സന്നിധിയിൽ പ്രാർത്ഥനയായി സമർപ്പിക്കുന്നു; എന്റെ പരിമിതികളെക്കാൾ വലിയവനായ അവിടുന്ന് എന്റെ പ്രാർത്ഥനകൾക്ക് ഉത്തരമരുളി എന്റെ ജീവിതത്തെ അനുഗ്രഹങ്ങളാൽ നിറയ്ക്കണമേ. അവിടുന്ന് എന്റെ ജീവിതത്തിൽ ചെയ്ത നന്മകളെ മറ്റുള്ളവരുടെ മുമ്പിൽ സാക്ഷീകരിക്കുവാൻ എന്റെ വായെ ഉപയോഗിക്കണമേ. സംസാരിക്കേണ്ട തക്കതായ വാക്കുകൾ പരിശുദ്ധാത്മാവിലൂടെ എനിക്ക് നൽകണമേ. എന്റെ ഭൗതിക ആവശ്യങ്ങളിലും ശരീരത്തിന്റെ ശക്തിക്കും ആഹാരത്തിനുമായി ഞാൻ അവിടുത്തെ ആശ്രയിക്കുന്നു. അനുദിന അന്നം തന്ന്, എന്റെ ശരീരത്തിനും ആത്മാവിനും ആവശ്യമായ ബലം നൽകി എന്നെ പോറ്റണമേ.
കർത്താവേ, എന്റെ ജീവിതത്തിലെ ഭയങ്ങളും സംശയങ്ങളും മാറ്റി, വിശ്വാസത്തോടെ അവിടുത്തെ മുൻപിൽ വായ് തുറക്കുവാൻ എന്നെ പഠിപ്പിക്കണമേ. എന്റെ ജീവിതത്തെ അവിടുത്തെ കൃപയാലും നന്മയാലും സമൃദ്ധമായി നിറയ്ക്കണമേ. യേശുക്രിസ്തുവിന്റെ നാമത്തിൽ തന്നെ, ആമേൻ.