ചരിത്രത്തിൽ ഇന്ന്

ഒക്ടോബർ (October) 6

ക്രിസ്തീയ ചരിത്രത്തിൽ ഒക്ടോബർ 6 അനുഗ്രഹീതരായ രണ്ട് ഭക്തന്മാരുടെ രക്തസാക്ഷിത്ത മരണത്തിൻ്റെ ഓർമ്മകൾ പേറുന്നു: വില്യം ടിൻഡേൽ, ജെയിംസ് ലാൻഡ്രം ഹോംസ് എന്നിവരാണവർ.

1. വില്യം ടിൻഡേലിന്റെ രക്തസാക്ഷിത്വം (1536)
ബൈബിൾ ചരിത്രത്തിൽ സുവർണ്ണലിപികളാൽ എഴുതപ്പെട്ട ഒന്നാണ് വില്യം ടിൻഡേലിന്റെ (William Tyndale) ഓർമ്മ. ഇംഗ്ലീഷ് ഭാഷയിലേക്ക് ആദ്യമായി ബൈബിൾ വിവർത്തനം ചെയ്ത് അച്ചടിച്ച ഇദ്ദേഹത്തെ, അക്കാലത്തെ സഭാ നിയമങ്ങൾക്ക് വിരുദ്ധമായി പ്രവർത്തിച്ചു എന്ന കുറ്റമാരോപിച്ച് 1536 ഒക്ടോബർ 6-ന് ബെൽജിയത്തിൽ വെച്ച് ക്രൂരമായി വധിച്ചു. ശ്വാസം മുട്ടിച്ച് കൊലപ്പെടുത്തിയ ശേഷം അദ്ദേഹത്തിന്റെ ശരീരം ചിതയിലിട്ട് കത്തിക്കുകയായിരുന്നു. മരണസമയത്ത് “കർത്താവേ, ഇംഗ്ലണ്ടിലെ രാജാവിന്റെ കണ്ണുകൾ തുറക്കണമേ” എന്നായിരുന്നു അദ്ദേഹത്തിന്റെ പ്രാർത്ഥന. ചർച്ച് ഓഫ് ഇംഗ്ലണ്ട് ഉൾപ്പെടെയുള്ള ആംഗ്ലിക്കൻ സഭകൾ ഒക്ടോബർ 6 അദ്ദേഹത്തിന്റെ ഓർമ്മദിനമായി ആചരിക്കുന്നു.

വില്യം ടിൻഡേൽ (A.D.1494 – 1536)
ഇംഗ്ലീഷ് ഭാഷാ ചരിത്രത്തിലും ബൈബിൾ തർജ്ജമയിലും വിപ്ലവകരമായ മാറ്റങ്ങൾ വരുത്തിയ ഒരു പ്രമുഖ ഇംഗ്ലീഷ് പണ്ഡിതനും നവീകരണപ്രസ്ഥാന നേതാവുമായിരുന്നു. ഇംഗ്ലണ്ടിലെ ഗ്ലൗസെസ്റ്റർഷയറിലാണ് ടിൻഡേൽ ജനിച്ചത്. ഓക്സ്ഫോർഡ്, കേംബ്രിഡ്ജ് സർവകലാശാലകളിൽ നിന്ന് ഉന്നത വിദ്യാഭ്യാസം നേടി. ഗ്രീക്ക്, എബ്രായ (Hebrew) ഭാഷകളിൽ അദ്ദേഹത്തിന് വലിയ പണ്ഡിത്യമുണ്ടായിരുന്നു.

സാധാരണക്കാരായ ജനങ്ങൾക്ക് സ്വന്തം ഭാഷയിൽ ബൈബിൾ വായിക്കാൻ സാധിക്കണമെന്നത് അദ്ദേഹത്തിന്റെ വലിയ ആഗ്രഹമായിരുന്നു. ഇതിനായി ഗ്രീക്ക്, എബ്രായ മൂലഗ്രന്ഥങ്ങളിൽ നിന്ന് നേരിട്ട് പുതിയ നിയമവും (New Testament) പഴയ നിയമത്തിന്റെ ചില ഭാഗങ്ങളും അദ്ദേഹം ആദ്യമായി ഇംഗ്ലീഷിലേക്ക് വിവർത്തനം ചെയ്തു. ഇംഗ്ലണ്ടിൽ ബൈബിൾ പ്രാദേശിക ഭാഷയിലേക്ക് മൊഴിമാറ്റുന്നത് അന്നത്തെ കത്തോലിക്കാ സഭയും ഹെൻറി എട്ടാമൻ രാജാവും നിരോധിച്ചിരുന്നു. അതിനാൽ തർജ്ജമ പൂർത്തിയാക്കാൻ അദ്ദേഹം ജർമ്മനിയിലേക്കും തുടർന്ന് ബെൽജിയത്തിലേക്കും നാടുവിട്ടു. 1526-ൽ അദ്ദേഹത്തിന്റെ ഇംഗ്ലീഷ് പുതിയ നിയമം രഹസ്യമായി പ്രിന്റ് ചെയ്ത് ഇംഗ്ലണ്ടിലേക്ക് കടത്തി.

സഭയുടെയും ഭരണാധികാരികളുടെയും കടുത്ത എതിർപ്പിനെത്തുടർന്ന് 1535-ൽ അന്താരാഷ്ട്ര ചാരന്മാരുടെ സഹായത്തോടെ അന്റ്‌വെർപ്പിൽ (Antwerp) വെച്ച് അദ്ദേഹം പിടിയിലായി. വിചാരണയ്ക്കു ശേഷം ‘പാഷണ്ഡത’ (Heresy) ആരോപിച്ച് 1536 ഒക്ടോബറിൽ ബെൽജിയത്തിലെ വിൽവോർഡിൽ വെച്ച് അദ്ദേഹത്തെ കഴുത്തു ഞെരിച്ചു കൊല്ലുകയും മൃതദേഹം കത്തിച്ചുകളയുകയും ചെയ്തു. “കർത്താവേ, ഇംഗ്ലണ്ടിലെ രാജാവിന്റെ കണ്ണുകൾ തുറക്കണമേ” എന്നതായിരുന്നു അദ്ദേഹത്തിന്റെ അവസാന വാക്കുകൾ.

പ്രാർത്ഥന ചരിത്രമായപ്പോൾ:
ടിൻഡേലിന്റെ മരണത്തിന് തൊട്ടടുത്ത വർഷങ്ങളിൽ തന്നെ ഹെൻറി എട്ടാമൻ രാജാവ് ഇംഗ്ലീഷ് ബൈബിളുകൾക്ക് അനുമതി നൽകി. പിന്നീട് പ്രസിദ്ധീകരിച്ച പ്രശസ്തമായ കിംഗ് ജെയിംസ് ബൈബിളിന്റെ (King James Bible) 80 ശതമാനത്തിലധികം ഭാഗങ്ങളും ടിൻഡേലിന്റെ വിവർത്തനത്തെ അടിസ്ഥാനമാക്കിയുള്ളതായിരുന്നു. modern ഇംഗ്ലീഷ് ഭാഷയുടെ വളർച്ചയ്ക്കും സാഹിത്യ രൂപീകരണത്തിനും അദ്ദേഹത്തിന്റെ വിവർത്തനശൈലി വലിയ സംഭാവന നൽകി.

2. മിഷനറി ചരിത്രത്തിലെ ഒരു കറുത്ത അധ്യായം (1861): ചൈനയിലെ ഷാൻടാങ്ങിൽ (Shandong Province) ശുശ്രൂഷ ചെയ്തിരുന്ന പ്രമുഖ മിഷനറിയായ ജെയിംസ് ലാൻഡ്‌റം ഹോംസ് (J. Landrum Holmes) തായ്‌പിങ് കലാപകാരികളാൽ വധിക്കപ്പെട്ടത് 1861 ഒക്ടോബർ 6-നായിരുന്നു. തൻ്റെ ഭാര്യ സാലി ഹോംസിനൊപ്പം 1959 ൽ ചൈനയിൽ മിഷണറിയായി എത്തിയ ജെയിംസ് മൂന്നു വർഷത്തിനുള്ളിൽ രക്തസാക്ഷിത്വം വഹിച്ചു. ജെയിംസിൻ്റെ മരണശേഷം സാലി ശൂശ്രൂഷ തുടർന്നതായി ചരിത്രം രേഖപ്പെടുത്തുന്നു.

മതേതരം:

1973 ലെ യോം കിപ്പൂർ യുദ്ധം
1973 ഒക്ടോബർ 6 ന് ജൂതന്മാരുടെ വിശുദ്ധ ദിനമായ യോം കിപ്പൂറിൽ ഈജിപ്തും സിറിയയും ചേർന്ന് ഇസ്രായേലിനെതിരെ നടത്തിയ മിന്നലാക്രമണത്തോടെയാണ് യോം കിപ്പൂർ യുദ്ധം ആരംഭിച്ചത്. 1967-ലെ ആറു ദിവസത്തെ യുദ്ധത്തിൽ ഇസ്രായേൽ പിടിച്ചെടുത്ത സിനായ് ഉപദ്വീപും ഗോലാൻ കുന്നുകളും തിരികെ പിടിക്കുകയായിരുന്നു അറബ് രാജ്യങ്ങളുടെ ലക്ഷ്യം. ആദ്യഘട്ടത്തിൽ ഇസ്രായേലിന് വലിയ തിരിച്ചടികൾ നേരിട്ടെങ്കിലും അമേരിക്കയുടെ സഹായത്തോടെ അവർ അതിവേഗം ശക്തമായ തിരിച്ചടി നൽകുകയും സൂയസ് കനാൽ കടന്ന് ഈജിപ്തിലേക്ക് മുന്നേറുകയും ചെയ്തു. ഐക്യരാഷ്ട്രസഭയുടെ ഇടപെടലിലൂടെ 1973 ഒക്ടോബർ 25-ന് യുദ്ധം അവസാനിച്ചെങ്കിലും, ഈ പോരാട്ടം 1973-ലെ ആഗോള എണ്ണ പ്രതിസന്ധിക്ക് കാരണമാവുകയും പിന്നീട് 1979-ൽ ഇസ്രായേലും ഈജിപ്തും തമ്മിലുള്ള ചരിത്രപ്രധാനമായ ക്യാമ്പ് ഡേവിഡ് സമാധാന കരാറിലേക്ക് വഴിയൊരുക്കുകയും ചെയ്തു.