അന്താരാഷ്ട്ര ബഹിരാകാശ നിലയം കേരളത്തിൽ നിന്ന് നേരിട്ടു കാണാൻ അവസരം

കോട്ടയം: മനുഷ്യനിർമ്മിത അത്ഭുതമായ അന്താരാഷ്ട്ര ബഹിരാകാശ നിലയം (International Space Station – ISS) കേരളത്തിലെ ആകാശത്ത് നഗ്നനേത്രങ്ങൾ കൊണ്ട് വ്യക്തമായി കാണാൻ ഈയാഴ്ച അവസരം ഒരുങ്ങുന്നു. സെപ്റ്റംബർ 4 വെള്ളിയാഴ്ച രാത്രിയാണ് കേരളത്തിലെ വാനനിരീക്ഷകർക്കും ശാസ്ത്രകുതുകികൾക്കും ഒരു അപൂർവ്വ ആകാശവിരുന്ന് ഒരുങ്ങുന്നത്. വൈകിട്ട് 7:42 മുതൽ 7:46 വരെയുള്ള സമയത്ത് തെക്ക്-പടിഞ്ഞാറൻ ആകാശത്താണ് ഈ കാഴ്ച ദൃശ്യമാകുക. ടെലിസ്കോപ്പോ ബൈനോക്കുലറോ ആവശ്യമില്ലാതെ നഗ്നനേത്രങ്ങൾ കൊണ്ടുതന്നെ ഈ വിസ്‌മയക്കാഴ്ച കാണാമെന്നതാണ് പ്രത്യേകത. കെട്ടിടങ്ങളുടെയോ മരങ്ങളുടെയോ തടസ്സമില്ലാത്ത ടെറസുകളോ തുറസ്സായ മൈതാനങ്ങളോ തിരഞ്ഞെടുക്കുക. കനത്ത മേഘങ്ങളോ മഴയോ ഇല്ലാത്ത തെളിഞ്ഞ ആകാശമാണെങ്കിൽ കൃത്യസമയത്ത് ഈ വിസ്മയം പൂർണ്ണമായി ആസ്വദിക്കാൻ സാധിക്കും.

ഭൂമിയിൽ നിന്ന് ഏകദേശം 400 കിലോമീറ്റർ ഉയരത്തിലുള്ള ഭ്രമണപഥത്തിലൂടെ സെക്കൻഡിൽ 7.66 കിലോമീറ്റർ (മണിക്കൂറിൽ ഏകദേശം 27,600 കി.മീ) എന്ന അവിശ്വസനീയ വേഗതയിലാണ് ഒരു കൂട്ടം ശാസ്ത്രജ്ഞർ താമസിക്കുന്ന കൂറ്റൻ ബഹിരാകാശ നിലയം ഐ.എസ്.എസ് സഞ്ചരിക്കുന്നത്. ഇതിൽ താമസിക്കുന്നവർക്ക് ദിവസവും 16 ഉദയാസ്തമയങ്ങൾ കാണാവുന്നതാണ്. ഇതിലെ കൂറ്റൻ സോളാർ പാനലുകളിൽ പതിക്കുന്ന സൂര്യപ്രകാശം ഭൂമിയിലേക്ക് പ്രതിഫലിക്കുന്നതിനാലാണ് താഴെനിന്ന് നോക്കുമ്പോൾ ഇത് അതിശോഭയുള്ള ഒരു വെള്ളി വെളിച്ചമായി കാണപ്പെടുന്നത്. മിന്നുന്ന ലൈറ്റുകൾ ഇല്ല: സാധാരണ വിമാനങ്ങളെപ്പോലെ മിന്നിമിന്നി കത്തുന്ന ലൈറ്റുകൾ ഇതിനുണ്ടാകില്ല. അതിവേഗത്തിൽ നേർരേഖയിൽ സഞ്ചരിക്കുന്ന പ്രകാശമുള്ള ഒരു നക്ഷത്രം പോലെയായിരിക്കും ഇത് കാണപ്പെടുക. ആകാശത്തെ മറ്റ് പ്രമുഖ നക്ഷത്രങ്ങളെക്കാൾ തിളക്കത്തോടെ ഇത് നീങ്ങുന്നത് ദൃശ്യമാകും.